काठमाडौं – अमेरिकी राष्ट्रपति डोनाल्ड ट्रम्पलाई स्वागत गर्न चिनियाँ राष्ट्रपति सी जिनपिङ आफैँ विमानस्थलमा पुग्नुभएको छ । एशिया–प्रशान्त आर्थिक सहयोग (एपेक) सम्मेलनका क्रममा सहभागी हुन चीन पुग्नुभएका ट्रम्पलाई सीले कूटनीतिक प्रचलन तोडेर सेन्जेन विमानस्थलमै पुगेर स्वागत गर्नुभएको हो ।

यसलाई केवल औपचारिक स्वागत मात्र नभई निकै सोचविचार गरी मिलाइएको कूटनीतिक क्षणका रूपमा हेरिएको बीबीसीले जनाएको छ । सी जिनपिङले यस्तो स्वागतको महत्त्व बुझ्ने खबरमा उल्लेख छ ।

राष्ट्रपति बनेयता सी जिनपिङ कुनै विदेशी नेतालाई स्वागत गर्न विमानस्थल गएको यो पहिलो पटक हो भन्ने मानिन्छ ।

यस वर्षको शुरूमा अमेरिकी राष्ट्रपति ट्रम्प आफैँ वाशिङ्टन क्षेत्रको एउटा विमानस्थलमा सी जिनपिङलाई स्वागत गर्न पुग्नुभएको थियो । अहिले चिनियाँ नेताले पनि त्यही व्यवहार दोहोर्‍याउँदै त्यसको प्रतिउत्तर दिइरहनुभएको छ ।

ट्रम्पले व्यक्तिगत सम्मान, औपचारिकता र हैसियतलाई धेरै महत्त्व दिने पनि सी जिनपिङलाई थाहा छ । त्यसैले यो जिम्मेवारी अरू कसैलाई नसुम्पिएर चिनियाँ राष्ट्रपतिले ट्रम्पप्रति विशेष सम्मान प्रकट गरिरहनुभएको छ ।

यसअघि आजै सेन्जेन आइपुग्नुभएका रुसी राष्ट्रपति भ्लादिमिर पुटिनलाई भने सीका शक्तिशाली चिफ अफ स्टाफ काई चीले स्वागत गर्नुभएको थियो ।

यसअघि सन् २००९ मा सीले अमेरिकी राष्ट्रपति बाराक ओबामालाई विमानस्थलमै स्वागत गर्नुभएको थियो । तर त्यति बेला उहाँ चीनको उपराष्ट्रपति पदमा हुनुहुन्थ्यो ।

आज र भोलि सेन्जेनमा चल्ने ‘एपेक सीईओ समिट २०२६’ मा विश्वका २१ अर्थतन्त्रका नेताहरूबीच द्विपक्षीय तथा क्षेत्रीय मुद्दाहरूमा महत्वपूर्ण छलफल हुने अपेक्षा गरिएको छ । एजेन्सी