काठमाडौं – लगातार चौथो कारोबार दिन बिहीबार सेयर बजार घटेको छ ।
बजारको परिसूचक नेप्से अघिल्लो दिनको तुलनामा ८.५० अंक घटेको छ । सो अंकको कमीपछि नेप्से २६५१ अंकमा कायम भएको छ । नेप्सेको यो अंक फागुन १३ यताकै न्यून हो ।
त्यस्तै एक महिनाको अवधिमा नेप्से १३५ अंक घटेको छ । जेठ ११ गते नेप्से २७८६ अंकमा थियो । आज साढे १२ बजेपछि बजारले केही बढ्ने संकेत देखाए पनि पौने २ बजेपछि फेरि ओर्लियो ।
कारोबार रकम घटेको छ । अघिल्लो दिन ४ अर्ब ४१ करोडको कारोबार भएकोमा आज २ अर्ब ८३ करोडमा खुम्चियो । यो कारोबार रकम जेठ ४ यताकै न्यून हो ।
८३ कम्पनीको मूल्य बढ्दा १७२ को घट्यो भने १९ को स्थिर रह्यो । उत्पादन बाहेक सबै समूहका सूचक घटे । उत्पादन तथा प्रशोधन समूह ०।१४ प्रतिशत बढ्यो ।
व्यापार सबैभन्दा धेरै १।९६ प्रतिशत घट्यो ।
बैंकिङ ०.१९, विकास बैंक ०.१५, फाइनान्स ०.३६ होटल तथा पर्यटन ०.५३, जलविद्युत् ०.४१, लगानी ०.१६, जीवन बीमा ०.२२, माइक्रोफाइनान्स ०.१५, निर्जीवन बीमा ०.४० तथा अन्य समूह ०.४७ प्रतिशत घटे ।
हालै सूचीकृत भएका दुई नयाँ कम्पनीको मूल्य १५ प्रतिशत बढेको छ । टक्सार पिखुवाखोला र याम्बलिङ हाइड्रोपावरको मूल्य १५ प्रतिशत बढेको हो । यो वृद्धिपछि दुवै कम्पनीको मूल्य ५२४.६० रुपैयाँ पुगेको छ ।
कालिका लघुवित्तको मूल्य १२.८४, सप्तकोशी विकास बैंकको ८.२० तथा रिलायन्स स्पिनिङ मिल्सको ३.२३ प्रतिशत बढ्यो । भुजुङ हाइड्रोपावरको ११.०३, सीवाईसी लघुवित्तको ८.९७, भगवती हाइड्रोपावरको ५.८४ तथा थ्रीस्टार हाइड्रोपावरको ५.५७ प्रतिशत मूल्य घट्यो ।
आज धेरै कारोबार भएकामा कम्पनीमा सोपान फर्मास्युटिकल्स, रिलायन्स स्पिनिङ मिल्स, सप्तकोशी विकास बैंक, आँखुखोला जलविद्युत् कम्पनी र नेपाल एसबीआई बैंक छन् ।
