काठमाडौं – सगरमाथामा यस वर्षको वसन्तकालीन आरोहणका लागि तेस्रो शिविरसम्म बाटो बनाउने काम सम्पन्न भएको छ ।
आधार शिविरदेखि दोस्रो शिविरसम्म सगरमाथा प्रदूषण नियन्त्रण समिति (एसपीसीसी) ले बाटो बनाएपछि त्योभन्दा माथि एक्सपिडिशन अपरेटर्स एसोसिएशन अफ नेपालले बाटो बनाएको हो ।
खुम्बु आइसफल हुँदै दोस्रो शिविरसम्मको बाटो खुलाउन चुनौतीपूर्ण मानिन्छ । त्यहाँ हरेक वर्ष एसपीसीसीले आइसफल डाक्टरहरू परिचालन गरेर भर्याङ लगाउने, डोरी टाँग्नेलगायतका काम गरी बाटो बनाउँछ ।
दोस्रो शिविरभन्दा माथि कुनै आरोहण कम्पनीले जिम्मा लिएर आरोहीहरूमार्फत डोरी टाँग्ने काम हुन्छ । उचाइ बढी भए पनि भूगोलका कारण तुलनात्मक रूपमा दोस्रो शिविरमाथि बाटो खुलाउने काम सहज हुने आरोहीहरू बताउँछन् ।
मौसम अनुकूल रहेमा चौथो शिविर हुँदै शिखरसम्म डोरी टाँग्ने काम १० दिनभित्र सक्ने लक्ष्य छ । यस सिजनका लागि सगरमाथा र ल्होत्से हिमालमा डोरी टाँग्ने तथा मार्ग निर्माण गर्न १० जना अनुभवी शेर्पाको टोली खटिएको छ ।
पर्यटन विभागका अनुसार आजदेखि आरोहण कम्पनीहरूले तेस्रो शिविरमा क्याम्प बनाउने अनुमति पाएका छन् । तर आज त्यहाँको मौसम प्रतिकूल बनेको छ ।
सगरमाथाको चौथो शिविरसम्म क्याम्प स्थापना गरिन्छ । चौथो शिविरबाट भने आरोहीहरू शिखरमा पुगेर फर्कन्छन् ।
पर्यटन विभागका अनुसार सगरमाथामा यस वर्षको वसन्तकालीन आरोहणका लागि अहिलेसम्म ४६४ जना आरोहीले अनुमति लिएका छन् । यस्तै ल्होत्सेमा १११ र नुप्सेमा ५२ जनाले आरोहण अनुमति लिएका छन् । सगरमाथाका छिमेकी भनिने ल्होत्से र नुप्से आरोहणका लागि पनि तेस्रो शिविरसम्म एउटै मार्ग प्रयोग हुन्छ ।
