रामेछाप – विमान कम्पनीहरुले रामेछाप–काठमाडौं उडान बन्द गर्दा टिकट काटेका यात्रु अलपत्र परेका छन् ।
निजी विमान कम्पनीहरुले रामेछापबाट काठमाडौं र काठमाडौंबाट रामेछापको लागि नागरिक उड्डयन मन्त्रालयले उडान तालिका नै नराखेको भन्दै दुई हप्तादेखि उडान सेवा बन्द गरेका हुन् ।
दुई हप्ता अघिसम्म तारा एअर, सीता एअर र समिट एअर गरी तीन वटा हवाई कम्पनीले दैनिक एक एक वटा उडान भर्दै आएका थिए । गएको असोजको बाढीले बीपी राजमार्ग क्षतविक्षत बनाएर काठमाडौंबाट रामेछापसम्मको सम्पर्क टुटेपछि र निजी विमान कम्पनीहरुले दैनिक उडान भर्दा निकै सहज भएको थियो ।
तर, अहिले उडान बन्द भएपछि रामेछापका बिरामी र यात्रुहरु बीपी राजमार्ग हुँदै घण्टौँ लगाएर काठमाडौं पुग्न बाध्य छन् । जिल्लामै विमानस्थल हुँदा पनि नागरिकहरुले सेवा नपाउनु दःखद् भएको मन्थली नगरपालिका–१ का नारायणदास श्रेष्ठले गुनासो गर्नुभएको छ ।
रामेछाप–काठमाडौं नियमित उडान भइरहेको समयमा जहाजको टिकट काटिसकेका नागरिहरु अहिले विमानको उडान सेवा बन्द हुँदा मारमा परेका छन् । रामेछाप विमानस्थलवाट सोलुखुम्बुको लुक्लाको लागि अहिले दैनिक ४० भन्दा वटा भन्दा धेरै उडान हुँदै आएका छन् ।
