काठमाडौं – काठमाडौं उपत्यकाका केही ठाउँमा असिनासहित वर्षा भएको छ । काठमाडौं उत्यकाको मौसममा आज दिउँसोपछि अचानक परिवर्तन भई मेघगर्जनसहित वर्षा शुरू भएको हो ।
उपत्यकाको धेरैजसो ठाउँमा बदली हुँदा बूढानीलकण्ठ, कपन, काँडाघारी, गौशाला, चाबहिललगायतका ठाउँमा असिनासहितको वर्षा भएको छ । वर्षाका कारण भाइटीकाको दिन आवतजावत गर्ने सर्वसाधारण तथा दिदीबहिनी र दाजुभाइहरू प्रभावित भएका छन् ।
मौसम पूर्वानुमान महाशाखाका अनुसार पश्चिमी वायुको आंशिक प्रभावका कारण काठमाडौंसहित पहाडी भूभागमा बदली र वर्षा भएको हो ।
यसैबीच असिनापानीका कारण धावनमार्ग अवरुद्ध भएपछि त्रिभुवन अन्तर्राष्ट्रिय विमानस्थल दिउँसो झन्डै एक घण्टा बन्द भएको छ।
महाशाखाले आज कोशी, बागमती र गण्डकी प्रदेशका हिमाली भूभागमा साधारणतया बदली रही थोरै ठाउँहरूमा मेघगर्जन र चट्याङसहित सामान्य वर्षा तथा हिमपातको सम्भावना रहेको जनाएको छ ।
