काठमाडौं – चितवनको मुग्लिन नजिक इच्छाकामना गाउँपालिका–४ घोप्टेभिरमा सुक्खा पहिरो खसेर अवरुद्ध पृथ्वी राजमार्ग खुलाउने काम भइरहेको छ ।
पहिरो पन्छाउन सडकको दुवैतर्फबाट उपकरणसहित काम भइरहेको हो । जिल्ला ट्राफिक प्रहरी कार्यालय चितवनकाअनुसार पहिरोले सडक आज बिहानैदेखि दुवैतर्फ अवरुद्ध छ । त्यसअघि हिजो पनि पहिरो खसेको थियो तर लगत्तै सफा गरी खुलाएको भए पनि फेरि आज बिहान पहिरो खसेको हो ।
पहिरोका कारण मुग्लिन हुँदै सङ्घीय राजधानी काठमाण्डौ भित्रने र बाहिरिने गाडी रोकिएका छन् । तिहार मनाउन आउजाउ गर्ने तथा अन्य यात्रु प्रभावित भएका छन् । नागढुङ्गा–मुग्लिन सडक योजना पश्चिम खण्डका प्रमुख सजना अधिकारीका अनुसार थप पहिरो नझरेमा दिउँसो १ बजेसम्म सडक खुल्नेछ ।
घोप्टेभिरमा निरन्तर सुक्खा पहिरो खसिरहेकाले पहिरो पन्छाउन ढिलाइ भएको उहाँको भनाइ छ ।
